yaad kya dast e hunar hai ki sanvartaa gaya main

Yaad kya dast-e-hunar hai ki sanvartaa gaya main Us ko sochaa to use yaad hee kartaa gaya main Is ko tahzeeb-e-junoon kahiye ki mujh se pahle Jaise bikhre hain sabhee log bikhartaa gaya main Naqsh kitne the ki ma.adoom hue silsila-vaar Aur har naqsh ke pahle se ubhartaa gaya main Ek tasveer banaa.ee thee mukammal na huee Ek hee rang lahoo rang thaa bhartaa gaya main Harf-e-iqraar hee kahtaa raha be-khaufee se Ya.anee inkaar ke aashob se Dartaa gaya main Daaman-e-vaqt se sau harf-e-sataa.ish bhee chune Aur ilzaam sabhee vaqt pe dhartaa gaya main Apne andar ke talaatum ne rakhaa hai aabaad Khud hee iqraar kiyaa khud hee mukartaa gaya main Mujh men har lamha fuzoon-tar huaa andoh-e-jamaal Aur tasveer ke maanind sanvartaa gaya main Har nafas baDhtaa gaya us kee tamannaa kaa kharosh Lamha lamha isee vahshat men nikhartaa gaya main Zindagee ku-e-malaamat hai koi kya Thahre Apnee hee vaz.a kaa main hoon so Thahartaa gaya main