ye haadisa mujhe hairaan kar gaya sar e shaam

Ye haadisa mujhe hairaan kar gaya sar-e-shaam Jo zakhm sub.h milaa thaa wo bhar gaya sar-e-shaam Mile the ham kaheen kaar-e-jahaan ke mele men Use bhee jaldee thee aur main bhee ghar gaya sar-e-shaam Ye aaj kis ko achaanak miraa khayaal aayaa Charaagh raah men ye kaun dhar gaya sar-e-shaam Khayaal-e-yaar kee fursat bhee ab kise hai naseeb Ye phuul sub.h khilaa aur bikhar gaya sar-e-shaam Tamaam din kee thakan se main bujh raha thaa magar Kisee kee yaad kaa chehra nikhar gaya sar-e-shaam Shab-e-firaaq kaa ahvaal yaad aa hee gaya Phir ek tiir saa dil men utar gaya sar-e-shaam Ye sub.h-o-shaam mire is qadar hee mere hain Ki jee uThaa hoon sahar-dam to mar gaya sar-e-shaam