zindagii ke daaman men rang o nuur o nikhat kya
— Pirzada Qasim
Zindagee ke daaman men rang-o-noor-o-nik.hat kya
Khvaab hee to dekhaa hai khvaab kee haqeeqat kya
Dil bhee qufl-e-abjad hai ek naam poochhe hai
Jaan le to khul jaa.e aakhir is men hairat kya
Aap ke ravayya par khush-gumaaniyaan kaisee
Koi maslahat hogee varna ye inaayat kya
Chob-e-khushk sahraa hoon aur aarzoo gul kee
Saadgee se baDh kar bhee hai koi himaaqat kya
Paas kaa andheraa bhee aas kaa ujaalaa bhee
Log isee ko kahte hain jhuTpuTe kee saa.at kya