zindagii ko ek khvaab e raaegaan samjhaa thaa main

Zindagee ko ek khvaab-e-raa.egaan samjhaa thaa main Be-karaan taa'beer hogee ye kahaan samjhaa thaa main Raah-rau guzre chale jaate the raah-e-zeest par Ik hujoom-e-jism-o-jaan ko kaarvaan samjhaa thaa main Itnee nazdeekee ki jaise chhoo raha hoon khud ko main Harz-e-jaan hai wo jise vahm-o-gumaan samjhaa thaa main Thaa bahut saffaak tanseekh-e-ta.alluq kaa fareb Us kaa 'aalam hai jise apna jahaan samjhaa thaa main Be-talab aasooda kab hotee hai kisht-e-aarzoo Be-gumaan dil ho rahegaa gulsitaan samjhaa thaa main Ik tavaqqo' thee ki ye lahja bhee samjhegaa koi Chashm-e-khoon-afshaan ko andaaz-e-bayaan samjhaa thaa main Rabt-e-baaham thaa faqat lafz-o-bayaan kaa irtibaat Hai koi rasm-e-wafa bhee darmiyaan samjhaa thaa main Is qadar maanoos thaa fitrat ke lahje kaa jamaal So use apna sukhan apnee zabaan samjhaa thaa main Ye to hain aa.indagaan kee raushnee ke daa.ere In ko ab tak apne qadmon ke nishaan samjhaa thaa main