aaj aur kal
— Qateel Shifai
Jab chhalakte hain zar-o-seem ke gaate hue jaam
Ek zahraab saa maahaul men ghul jaataa hai
Kaanp uThtaa hai tahee-dast javaanon kaa ghuroor
Husn jab resham-o-kam-khvaab men tal jaataa hai
Main ne dekhaa hai ki aflaas ke sahraaon men
Qaafile azmat-e-ehsaas ke ruk jaate hain
Bekasee garm nigaahon ko jhulas detee hai
Dil kisee sho.ala-e-zartaab se phuk jaate hain
Jin usoolon se ibaarat hai mohabbat kee asaas
Un usoolon ko yahaan tod diyaa jaataa hai
Apnee sahmee huee manzil ke tahaffuz ke liye
Rahguzaaron men dhuaan chhoD diyaa jaataa hai
Main ne jo raaz zamaane se chhupaanaa chaahaa!
Too ne aafaaq pe us raaz kaa dar khol diyaa
Meree baanhon ne jo dekhe the sunahre sapne
Too ne sone kee taraazoo men unhen tol diyaa
Aaj aflaas ne khaa.ee hai zar-o-seem se maat
Is men lekin tire chillon kaa koi dosh nahin
Ye taghayyur usee maahaul kaa parvarda hai
Apnee be-rang tabaahee kaa jise hosh nahin
Rahguzaaron ke dhundalke to zaraa chhaT jaa.en
Apne talvon se ye kaanTe bhee nikal jaa.enge
Aaj aur kal kee masaafat ko zaraa tai kar len
Vaqt ke saath iraade bhee badal jaa.enge
Jab chhalakte hain zar-o-sim ke gate hue jam
Ek zahrab sa mahaul mein ghul jata hai
Kanp uThta hai tahi-dast jawanon ka ghurur
Husn jab resham-o-kam-KHwab mein tal jata hai
Main ne dekha hai ki aflas ke sahraon mein
Qafile azmat-e-ehsas ke ruk jate hain
Bekasi garm nigahon ko jhulas deti hai
Dil kisi shoala-e-zartab se phuk jate hain
Jin usulon se ibarat hai mohabbat ki asas
Un usulon ko yahan tod diya jata hai
Apni sahmi hui manzil ke tahaffuz ke liye
Rahguzaron mein dhuan chhoD diya jata hai
Main ne jo raaz zamane se chhupana chaha!
Tu ne aafaq pe us raaz ka dar khol diya
Meri banhon ne jo dekhe the sunahre sapne
Tu ne sone ki taraazu mein unhen tol diya
Aaj aflas ne khai hai zar-o-sim se mat
Is mein lekin tere chillon ka koi dosh nahin
Ye taghayyur usi mahaul ka parwarda hai
Apni be-rang tabahi ka jise hosh nahin
Rahguzaron ke dhundalke to zara chhaT jaen
Apne talwon se ye kanTe bhi nikal jaenge
Aaj aur kal ki masafat ko zara tai kar len
Waqt ke sath irade bhi badal jaenge