ai dost tirii aankh jo nam hai to mujhe kya
— Qateel Shifai
Ai dost! tiree aankh jo nam hai to mujhe kya
Main khuub hansoongaa tujhe gham hai to mujhe kya
Kya main ne kahaa thaa ki zamaane se bhalaa kar
Ab too bhee sazaavaar-e-sitam hai to mujhe kya
Haan le le qasam gar mujhe qatra bhee milaa ho
Too shaakee-e-arbaab-e-karam hai to mujhe kya
Jis dar se nadaamat ke sivaa Kuch nahin miltaa
Us dar pe tiraa sar bhee jo kham hai to mujhe kya
Main ne to pukaaraa hai mohabbat ke ufaq se
Raste men tire sang-e-haram hai to mujhe kya
Bhoolaa to na hogaa tujhe suqraat kaa anjaam
Haathon men tire saaghar-e-sam hai to mujhe kya
Patthar na paDen gar sar-e-baazaar to kahnaa
Too motarif-e-husn-e-sanam hai to mujhe kya
Main sarmad o mansoor banaa hoon tiree khaatir
Ye bhee tiree ummeed se kam hai to mujhe kya