garmii e hasrat e naakaam se jal jaate hain
— Qateel Shifai
Garmee-e-hasrat-e-naakaam se jal jaate hain
Ham charaaghon kee tarah shaam se jal jaate hain
Sham.a jis aag men jaltee hai numaa.ish ke liye
Ham usee aag men gumnaam se jal jaate hain
Bach nikalte hain agar aatish-e-sayyaal se ham
Shola-e-aariz-e-gulfaam se jal jaate hain
Khud-numaa.ee to nahin sheva-e-arbaab-e-wafa
Jin ko jalnaa ho wo aaraam se jal jaate hain
Rabt-e-baaham pe hamen kya na kahenge dushman
Aashnaa jab tire paighaam se jal jaate hain
Jab bhee aataa hai miraa naam tire naam ke saath
Jaane kyuun log mire naam se jal jaate hain