haalaat ke qadmon pe qalandar nahin girtaa
— Qateel Shifai
Haalaat ke qadmon pe qalandar nahin girtaa
TuuTe bhee jo taaraa to zameen par nahin girtaa
Girte hain samundar men baDe shauq se Dariya
Lekin kisee Dariya men samundar nahin girtaa
Samjho vahaan phaldaar shajar koi nahin hai
Wo sahn ki jis men koi patthar nahin girtaa
Itnaa to huaa faa.eda baarish kee kamee kaa
Is shahr men ab koi phisal kar nahin girtaa
In'aam ke laalach men likhe mad.h kisee kee
Itnaa to kabhi koi sukhan-var nahin girtaa
Hairaan hai ka.ee roz se Thahraa huaa paanee
Taalaab men ab kyuun koi kankar nahin girtaa
Us banda-e-khuddaar pe nabiyon kaa hai saaya
Jo bhuuk men bhee luqma-e-tar par nahin girtaa
Karnaa hai jo sar ma.arka-e-zeest to sun le
Be-baazoo-e-haidar dar-e-khaibar nahin girtaa
Qaa.em hai 'qateel' ab ye mire sar ke sutoon par
Bhaunchaal bhee aa.e to miraa ghar nahin girtaa