haalaat se khauf khaa raha hoon
— Qateel Shifai
Haalaat se khauf khaa raha hoon
Sheeshe ke mahal banaa raha hoon
Siine men mire hai mom kaa dil
Sooraj se badan chhupaa raha hoon
Mahroom-e-nazar hai jo zamaana
Aa.eena use dikhaa raha hoon
Ahbaab ko de raha hoon dhokaa
Chehre pe khushee sajaa raha hoon
Dariya-e-furaat hai ye Dunya
Pyaasaa hee palaT ke jaa raha hoon
Hai shahr men qaht pattharon kaa
Jazbaat ke zakhm khaa raha hoon
Mumkin hai javaab de udaasee
Dar apna hee khaTkhaTaa raha hoon
Aayaa na 'qateel' dost koi
Saayon ko gale lagaa raha hoon