haath diyaa is ne mire haath men
— Qateel Shifai
Haath diyaa is ne mire haath men
Main to valee ban gaya ik raat men
Ishq karoge to kamaaoge naam
Tohmaten baTtee nahin khairaat men
Ishq buree shai sahee par dosto
Dakhl na do tum miree har baat men
Mujh pe tavajjoh hai sab aafaat kee
Koi kashish to hai miree zaat men
Raah-numaa thaa miraa ik saamree
Kho gaya main shahr-e-tilismaat men
Mujh ko lagaa aam saa ik aadmee
Aayaa wo jab kaam ke auqaat men
Shaam kee gul-rang havaa kya chalee
Dard mahakne lagaa jazbaat men
Haath men kaaghaz kee liye chhatriyaan
Ghar se na niklaa karo barsaat men
Rabt baDhaayaa na 'qateel' is liye
Farq thaa donon ke khayaalaat men