ho chukaa intizaar sone de
— Qateel Shifai
Ho chukaa intizaar sone de
Ai dil-e-be-qaraar sone de
MiT ga.iin raunaqen charaaghon kee
LuT ga.e rahguzaar sone de
AahaTon ke fareb men mat aa
Un kaa kya aitbaar sone de
Pee liye aansuon ke jaam bahut
TooTtaa hai khumaar sone de
Too ne dekhee to hogee shaam-e-khizaan
Ai mareez-e-bahaar sone de
Oonghtaa hai udaas peDon par
Chaandnee kaa ghubaar sone de
Aakhir-e-shab na koi aa.egaa
Mere shab-zinda-daar sone de
Duur us paar dekhtaa kya hai
Vaaqif-e-khoo-e-yaar sone de
Ban ga.e hain hamaare siine men
Hasraton ke mazaar sone de