marhala raat kaa jab aaegaa

Marhala raat kaa jab aa.egaa Jism saa.e ko taras jaa.egaa Chal paDee rasm jo kaj-fahmee kee Baat kya phir koi kar paa.egaa Sach se katraa.e agar log yahaan Lafz mafhoom se katraa.egaa Aitbaar us kaa hamesha karnaa Wo to jhooTee bhee qasam khaa.egaa Too na hogee to phir ai shaam-e-firaaq Kaun aa kar hamen bahalaa.egaa Ham use yaad bahut aa.enge Jab use bhee koi Thukraa.egaa Kaa.enaat us kee miree zaat men hai Mujh ko kho kar wo kise paa.egaa Na rahe jab wo bhale din bhee 'qateel' Ye zamaana bhee guzar jaa.egaa