mirii nazar se na ho duur ek pal ke liye

Miree nazar se na ho duur ek pal ke liye Tiraa vajood hai laazim miree ghazal ke liye Kahaan se DhoonDh ke laa.oon charaagh saa wo badan Taras ga.ee hain nigaahen kanval kanval ke liye Kisee kisee ke naseebon men ishq likkhaa hai Har ik dimaagh bhalaa kab hai is khalal ke liye Huee na jur.at-e-guftaar to sabab ye thaa Mile na lafz tire husn-e-be-badal ke liye Sadaa jiye ye miraa shahr-e-be-misaal jahaan Hazaar jhonpaDe girte hain ik mahal ke liye 'qateel' zakhm sahoon aur muskuraataa rahoon Bane hain daa.ere kya kya mire amal ke liye