raabta laakh sahii qaafila saalaar ke saath
— Qateel Shifai
Raabta laakh sahee qaafila-saalaar ke saath
Ham ko chalnaa hai magar vaqt kee raftaar ke saath
Gham lage rahte hain har aan khushee ke peechhe
Dushmanee dhoop kee hai saaya-e-deevaar ke saath
Kis tarah apnee mohabbat kee main takmeel karoon
Gham-e-hastee bhee to shaamil hai gham-e-yaar ke saath
Lafz chuntaa hoon to mafhoom badal jaataa hai
Ik na ik khauf bhee hai jur.at-e-iz.haar ke saath
Dushmanee mujh se kiye jaa magar apna ban kar
Jaan le le miree sayyaad magar pyaar ke saath
Do ghaDee aao mil aa.en kisee 'ghaalib' se 'qateel'
Hazrat-e-'zauq' to vaabasta hain darbaar ke saath