raaste yaad nahin raah numaa yaad nahin
— Qateel Shifai
Raaste yaad nahin raah-numaa yaad nahin
Ab mujhe Kuch tiree galiyon ke sivaa yaad nahin
Phir khayaalon men wo biite hue saavan aa.e
Lekin ab tujh ko papeehe kee sadaa yaad nahin
Ek va.ada thaa jo sheeshe kee tarah Toot gaya
Haadisa kab ye huaa kaise huaa yaad nahin
Ham diyaa karte the aghyaar ko ta.ana jin kaa
Ab to ham ko bhee wo aadaab-e-wafa yaad nahin
Vaz.a-daaree se hai majboor miraa pyaar 'qateel'
Sab puraane hain koi daagh nayaa yaad nahin