us adaa se bhi hoon main aashnaa tujhe itnaa jis pe guruur hai
— Qateel Shifai
Us adaa se bhee hoon main aashnaa tujhe itnaa jis pe ghuroor hai
Main jiyoongaa tere baghair bhee mujhe zindagee kaa shu.oor hai
Na havas mujhe mai-e-naab kee na talab sabaa-o-sahaab kee
Tiree chashm-e-naaz kee khair ho mujhe be-piye hee suroor hai
Jo samajh liyaa tujhe baa-wafa to phir is men teree bhee kya khataa
Ye khalal hai mere dimaagh kaa ye miree nazar kaa qusoor hai
Koi baat dil men wo Thaan ke na ulajh paDe tiree shaan se
Wo niyaaz-mand jo sar-ba-kham ka.ee din se tere huzoor hai
Mujhe dengee khaak tasalliyaan tiree jaan-gudaaz tajalliyaan
Main savaal-e-shauq-e-visaal hoon to jalaal-e-sho.ala-e-toor hai
Main nikal ke bhee tire daam se na giroongaa apne maqaam se
Main 'qateel'-e-tegh-e-jafaa sahee mujhe tujh se ishq zaroor hai