wo shakhs ki main jis se mohabbat nahin kartaa
— Qateel Shifai
Wo shakhs ki main jis se mohabbat nahin kartaa
Hanstaa hai mujhe dekh ke nafrat nahin kartaa
PakDaa hee gaya hoon to mujhe daar pe kheencho
Sachchaa hoon magar apnee vakaalat nahin kartaa
Kyuun bakhsh diyaa mujh se gunahgaar ko maulaa
Munsif to kisee se bhee ri.aayat nahin kartaa
Ghar vaalon ko ghaflat pe sabhee kos rahe hain
Choron ko magar koi malaamat nahin kartaa
Kis qaum ke dil men nahin jazbaat-e-baraaheem
Kis mulk pe namrood hukoomat nahin kartaa
Dete hain ujaale mire sajdon kee gavaahee
Main chhup ke andhere men ibaadat nahin kartaa
Bhoolaa nahin main aaj bhee aadaab-e-javaanee
Main aaj bhee auron ko naseehat nahin kartaa
Insaan ye samjhen ki yahaan dafn khuda hai
Main aise mazaaron kee ziyaarat nahin kartaa
Dunya men 'qateel' us saa munaafiq nahin koi
Jo zulm to sahtaa hai baghaavat nahin kartaa