yaaro kahaan tak aur mohabbat nibhaauun main
— Qateel Shifai
Yaaro kahaan tak aur mohabbat nibhaa.oon main
Do mujh ko bad-duaa ki use bhuul jaaon main
Dil to jalaa kiyaa hai wo sho.ala saa aadmee
Ab kis ko chhoo ke haath bhee apna jalaa.oon main
Suntaa hoon ab kisee se wafa kar raha hai wo
Ai zindagee khushee se kaheen mar na jaaon main
Ik shab bhee vasl kee na miraa saath de sakee
Ahd-e-firaaq aa ki tujhe aazmaa.oon main
Badnaam mere qatl se tanhaa too hee na ho
Laa apnee mohr bhee sar-e-mahzar lagaa.oon main
Utraa hai baam se koi ilhaam kee tarah
Jee chaahtaa hai saaree zameen ko sajaa.oon main
Us jaisaa naam rakh ke agar aa.e maut bhee
Hans kar use 'qateel' gale se lagaa.oon main