ye moajiza bhi mohabbat kabhi dikhaae mujhe

Ye mo.ajiza bhee mohabbat kabhi dikhaa.e mujhe Ki sang tujh pe gire aur zakhm aa.e mujhe Main apne paanv tale raundtaa hoon saa.e ko Badan miraa hee sahee dopahar na bhaa.e mujhe Ba-rang-e-ood milegee use miree khushboo Wo jab bhee chaahe baDe shauq se jalaa.e mujhe Main ghar se teree tamannaa pahan ke jab nikloon Barahna shahr men koi nazar na aa.e mujhe Vahee to sab se ziyaada hai nukta-cheen meraa Jo muskuraa ke hamesha gale lagaa.e mujhe Main apne dil se nikaaloon khayaal kis kis kaa Jo too nahin to koi aur yaad aa.e mujhe Zamaana dard ke sahraa tak aaj le aayaa Guzaar kar tiree zulfon ke saa.e saa.e mujhe Wo meraa dost hai saare jahaan ko hai ma.aloom Daghaa kare wo kisee se to sharm aa.e mujhe Wo mehrbaan hai to iqraar kyuun nahin kartaa Wo bad-gumaan hai to sau baar aazmaa.e mujhe Main apnee zaat men neelaam ho raha hoon 'qateel' Gham-e-hayaat se kah do khareed laa.e mujhe