ajnabii khvaahishen siine men dabaa bhi na sakuun
— Rahat Indori
Ajnabee khvaahishen siine men dabaa bhee na sakoon
Aise ziddee hain parinde ki uDaa bhee na sakoon
Phoonk Daaloongaa kisee roz main dil kee Dunya
Ye tiraa khat to nahin hai ki jilaa bhee na sakoon
Miree ghairat bhee koi shai hai ki mahfil men mujhe
Us ne is tarah bulaayaa hai ki jaa bhee na sakoon
Phal to sab mere darakhton ke pake hain lekin
Itnee kamzor hain shaakhen ki hilaa bhee na sakoon
Ik na ik roz kaheen DhoonD hee loongaa tujh ko
Thokaren zahr nahin hain ki main khaa bhee na sakoon