biimaar ko maraz ki davaa denii chaahiye

Beemaar ko maraz kee davaa denee chaahiye Main piinaa chaahtaa hoon pilaa denee chaahiye Allaah barkaton se navaazegaa ishq men Hai jitnee poonjee paas lagaa denee chaahiye Dil bhee kisee faqeer ke hujre se kam nahin Dunya yaheen pe laa ke chhupaa denee chaahiye Main khud bhee karnaa chaahtaa hoon apna saamnaa Tujh ko bhee ab naqaab uThaa denee chaahiye Main phuul hoon to phuul ko gul-daan ho naseeb Main aag hoon to aag bujhaa denee chaahiye Main taaj hoon to taaj ko sar par sajaa.en log Main khaak hoon to khaak uDaa denee chaahiye Main jabr hoon to jabr kee taa.eed band ho Main sabr hoon to mujh ko duaa denee chaahiye Main khvaab hoon to khvaab se chaunkaaiye mujhe Main niind hoon to niind uDaa denee chaahiye Sach baat kaun hai jo sar-e-aam kah sake Main kah raha hoon mujh ko sazaa denee chaahiye