dilon men aag labon par gulaab rakhte hain
— Rahat Indori
Dilon men aag labon par gulaab rakhte hain
Sab apne chehron pe dohree naqaab rakhte hain
Hamen charaagh samajh kar bujhaa na paaoge
Ham apne ghar men ka.ee aaftaab rakhte hain
Bahut se log ki jo harf-aashnaa bhee nahin
Isee men khush hain ki teree kitaab rakhte hain
Ye mai-kada hai wo masjid hai wo hai but-khaana
Kaheen bhee jaao farishte hisaab rakhte hain
Hamaare shahr ke manzar na dekh paa.enge
Yahaan ke log to aankhon men khvaab rakhte hain