haath khaalii hain tire shahr se jaate jaate
— Rahat Indori
Haath khaalee hain tire shahr se jaate jaate
Jaan hotee to miree jaan luTaate jaate
Ab to har haath kaa patthar hamen pahchaantaa hai
Umr guzree hai tire shahr men aate jaate
Ab ke maayoos huaa yaaron ko rukhsat kar ke
Jaa rahe the to koi zakhm lagaate jaate
Rengne kee bhee ijaazat nahin ham ko varna
Ham jidhar jaate na.e phuul khilaate jaate
Main to jalte hue sahraaon kaa ik patthar thaa
Tum to Dariya the miree pyaas bujhaate jaate
Mujh ko rone kaa saleeqa bhee nahin hai shaayad
Log hanste hain mujhe dekh ke aate jaate
Ham se pahle bhee musaafir ka.ee guzre honge
Kam se kam raah ke patthar to haTaate jaate