main laakh kah duun ki aakaash hoon zameen hoon main
— Rahat Indori
Main laakh kah duun ki aakaash hoon zameen hoon main
Magar use to khabar hai ki Kuch nahin hoon main
Ajiib log hain meree talaash men mujh ko
Vahaan pe DhoonD rahe hain jahaan nahin hoon main
Main aa.inon se to maayoos lauT aayaa thaa
Magar kisee ne bataayaa bahut haseen hoon main
Wo zarre zarre men maujood hai magar main bhee
Kaheen kaheen hoon kahaan hoon kaheen nahin hoon main
Wo ik kitaab jo mansoob tere naam se hai
Usee kitaab ke andar kaheen kaheen hoon main
Sitaaro aao miree raah men bikhar jaao
Ye meraa hukm hai haalaanki Kuch nahin hoon main
Yaheen husain bhee guzre yaheen yazeed bhee thaa
Hazaar rang men Duubee huee zameen hoon main
Ye booDhee qabren tumhen Kuch nahin bataa.engee
Mujhe talaash karo dosto yaheen hoon main