mujhe dubo ke bahut sharmsaar rahtii hai
— Rahat Indori
Mujhe Dubo ke bahut sharmsaar rahtee hai
Wo ek mauj jo Dariya ke paar rahtee hai
Hamaare taaq bhee be-zaar hain ujaalon se
Diye kee lau bhee havaa par savaar rahtee hai
Phir us ke ba.ad vahee baasee manzaron ke juloos
Bahaar chand hee lamhe bahaar rahtee hai
Isee se qarz chukaa.e hain main ne sadiyon ke
Ye zindagee jo hamesha udhaar rahtee hai
Hamaaree shahr ke daanishvaron se yaaree hai
Isee liye to qabaa taar taar rahtee hai
Mujhe khareedne vaalo qataar men aao
Wo chiiz hoon jo pas-e-ishtihaar rahtee hai