sabab wo puuchh rahe hain udaas hone kaa

Sabab wo poochh rahe hain udaas hone kaa Miraa mizaaj nahin be-libaas hone kaa Nayaa bahaana hai har pal udaas hone kaa Ye faa.eda hai tire ghar ke paas hone kaa Mahaktee raat ke lamho nazar rakho mujh par Bahaanaa DhoonD raha hoon udaas hone kaa Main tere paas bataa kis gharaz se aayaa hoon Suboot de mujhe chehra-shanaas hone kaa Miree ghazal se banaa zehn men koi tasveer Sabab na poochh mire devdaas hone kaa Kahaan ho aao miree bhoolee-bisree yaado aao Khush-aamdeed hai mausam udaas hone kaa Ka.ee dinon se tabee.at miree udaas na thee Yahee javaaz bahut hai udaas hone kaa Main ahmiyat bhee samajhtaa hoon qahqahon kee magar Mazaa Kuch apna alag hai udaas hone kaa Mire labon se tabassum mazaaq karne lagaa Main likh raha thaa qaseeda udaas hone kaa Pata nahin ye parinde kahaan se aa pahunche Abhee zamaana kahaan thaa udaas hone kaa Main kah raha hoon ki ai dil idhar-udhar na bhaTak Guzar na jaa.e zamaana udaas hone kaa