zindagii ki har kahaanii be asar ho jaaegii
— Rahat Indori
Zindagee kee har kahaanee be-asar ho jaa.egee
Ham na honge to ye dunya dar-ba-dar ho jaa.egee
Paaon patthar kar ke chhoDegee agar ruk jaa.iye
Chalte rahiye to zameen bhee ham-safar ho jaa.egee
Jugnuon ko saath le kar raat raushan keejiye
Raasta suraj kaa dekhaa to sahar ho jaa.egee
Zindagee bhee kaash mere saath rahtee 'umr-bhar
Khair ab jaise bhee honee hai basar ho jaa.egee
Tum ne khud hee sar chaDhaa.ee thee so ab chakkho mazaa
Main na kahtaa tha ki dunya dard-e-sar ho jaa.egee
Talkhiyaan bhee laazmee hain zindagee ke vaaste
Itnaa meeThaa ban ke mat rahiye shakar ho jaa.egee