charaag e tuur jalaao badaa andheraa hai

Charaagh-e-toor jalaao baDaa andheraa hai Zaraa naqaab uThaao baDaa andheraa hai Abhee to sub.h ke maathe kaa rang kaalaa hai Abhee fareb na khaao baDaa andheraa hai Vo jin ke hote hain khursheed aasteenon men Unhen kaheen se bulaao baDaa andheraa hai Mujhe tumhaaree nigaahon pe e'timaad nahin Mire qareeb na aao baDaa andheraa hai Faraaz-e-'arsh se TuuTaa huaa koi taara Kaheen se DhoonD ke laao baDaa andheraa hai Baseeraton pe ujaalon kaa khauf taaree hai Mujhe yaqeen dilaao baDaa andheraa hai Jise zabaan-e-khirad men sharaab kahte hain Vo raushnee see pilaao baDaa andheraa hai Ba-naam-e-zohra-jabeenaan-e-khitta-e-firdaus Kisee kiran ko jagaao baDaa andheraa hai Charagh-e-tur jalao baDa andhera hai Zara naqab uThao baDa andhera hai Abhi to subh ke mathe ka rang kala hai Abhi fareb na khao baDa andhera hai Wo jin ke hote hain KHurshid aastinon mein Unhen kahin se bulao baDa andhera hai Mujhe tumhaari nigahon pe e'timad nahin Mere qarib na aao baDa andhera hai Faraaz-e-'arsh se TuTa hua koi tara Kahin se DhunD ke lao baDa andhera hai Basiraton pe ujalon ka KHauf tari hai Mujhe yaqin dilao baDa andhera hai Jise zaban-e-KHirad mein sharab kahte hain Wo raushni si pilao baDa andhera hai Ba-nam-e-zohra-jabinan-e-KHitta-e-firdaus Kisi kiran ko jagao baDa andhera hai