main talkhii e hayaat se ghabraa ke pii gaya
— Saghar Siddiqui
Main talkhee-e-hayaat se ghabraa ke pee gaya
Gham kee siyaah raat se ghabraa ke pee gaya
Itnee daqeeq shai koi kaise samajh sake
Yazdaan ke vaaqi.aat se ghabraa ke pee gaya
Chhalke hue the jaam pareshaan thee zulf-e-yaar
Kuchh aise haadsaat se ghabraa ke pee gaya
Main aadmee hoon koi farishta nahin huzoor
Main aaj apnee zaat se ghabraa ke pee gaya
Duniyaa-e-haadsaat hai ik dardnaak giit
Duniyaa-e-haadsaat se ghabraa ke pee gaya
KaanTe to khair kaanTe hain is kaa gila hee kya
Phoolon kee vaardaat se ghabraa ke pee gaya
'saaghar' wo kah rahe the ki pee leejiye huzoor
Un kee guzaarishaat se ghabraa ke pee gaya
Main talKHi-e-hayat se ghabra ke pi gaya
Gham ki siyah raat se ghabra ke pi gaya
Itni daqiq shai koi kaise samajh sake
Yazdan ke waqiat se ghabra ke pi gaya
Chhalke hue the jam pareshan thi zulf-e-yar
Kuchh aise hadsat se ghabra ke pi gaya
Main aadmi hun koi farishta nahin huzur
Main aaj apni zat se ghabra ke pi gaya
Duniya-e-hadsat hai ek dardnak git
Duniya-e-hadsat se ghabra ke pi gaya
KanTe to KHair kanTe hain is ka gila hi kya
Phulon ki wardat se ghabra ke pi gaya
'saghar' wo kah rahe the ki pi lijiye huzur
Un ki guzarishat se ghabra ke pi gaya