ai shariif insaano Khoon apna ho yaa paraayaa ho

Khoon apna ho yaa paraayaa ho Nasl-e-aadam kaa Khoon hai aakhir Jang mashriq men ho ki maghrib men Amn-e-aalam kaa Khoon hai aakhir Bam gharon par giren ki sarhad par Rooh-e-ta.ameer zakhm khaatee hai Khet apne jalen ki auron ke Ziist faaqon se tilmilaatee hai Tank aage baDhen ki pichhe haTen Kokh dhartee kee baanjh hotee hai Fat.h kaa jashn ho ki haar kaa sog Zindagee mayyaton pe rotee hai Jang to khud hee ek mas.ala hai Jang kya mas.alon kaa hal degee Aag aur Khoon aaj bakhshegee Bhuuk aur ehtiyaaj kal degee Is liye ai shareef insaano Jang Taltee rahe to behtar hai Aap aur ham sabhee ke aangan men Sham' jaltee rahe to behtar hai 2 Bartaree ke suboot kee khaatir Khuun bahaanaa hee kya zarooree hai Ghar kee taareekiyaan miTaane ko Ghar jalaanaa hee kya zarooree hai Jang ke aur bhee to maidaan hain Sirf maidaan-e-kisht-o-khoon hee nahin Haasil-e-zindagee khirad bhee hai Haasil-e-zindagee junoon hee nahin Aao is teera-bakht dunya men Fikr kee raushnee ko 'aam karen Amn ko jin se taqviyat pahunche Aisee jangon kaa ehtimaam karen Jang vahshat se barbariyyat se Amn tahzeeb-o-irtiqaa ke liye Jang marg-aafreen siyaasat se Amn insaan kee baqaa ke liye Jang iflaas aur ghulaamee se Amn behtar nizaam kee khaatir Jang bhaTkee huee qayaadat se Amn be-bas 'avaam kee khaatir Jang sarmaa.e ke tasallut se Amn jamhoor kee khushee ke liye Jang jangon ke falsafe ke khilaaf Amn pur-amn zindagee ke liye KHun apna ho ya paraya ho Nasl-e-adam ka KHun hai aaKHir Jang mashriq mein ho ki maghrib mein Amn-e-alam ka KHun hai aaKHir Bam gharon par giren ki sarhad par Ruh-e-tamir zaKHm khati hai Khet apne jalen ki auron ke Zist faqon se tilmilati hai Tank aage baDhen ki pichhe haTen Kokh dharti ki banjh hoti hai Fath ka jashn ho ki haar ka sog Zindagi mayyaton pe roti hai Jang to KHud hi ek masala hai Jang kya masalon ka hal degi Aag aur KHun aaj baKHshegi Bhuk aur ehtiyaj kal degi Is liye ai sharif insano Jang Talti rahe to behtar hai Aap aur hum sabhi ke aangan mein Sham' jalti rahe to behtar hai 2 Bartari ke subut ki KHatir KHun bahana hi kya zaruri hai Ghar ki tarikiyan miTane ko Ghar jalana hi kya zaruri hai Jang ke aur bhi to maidan hain Sirf maidan-e-kisht-o-KHun hi nahin Hasil-e-zindagi KHirad bhi hai Hasil-e-zindagi junun hi nahin Aao is tira-baKHt duniya mein Fikr ki raushni ko 'am karen Amn ko jin se taqwiyat pahunche Aisi jangon ka ehtimam karen Jang wahshat se barbariyyat se Amn tahzib-o-irtiqa ke liye Jang marg-afrin siyasat se Amn insan ki baqa ke liye Jang iflas aur ghulami se Amn behtar nizam ki KHatir Jang bhaTki hui qayaadat se Amn be-bas 'awam ki KHatir Jang sarmae ke tasallut se Amn jamhur ki KHushi ke liye Jang jangon ke falsafe ke KHilaf Amn pur-amn zindagi ke liye