log aurat ko faqat jism samajh lete hain

Log aurat ko faqat jism samajh lete hain Ruuh bhee hotee hai us men ye kahaan sochte hain Ruuh kya hotee hai is se unhen matlab hee nahin Vo to bas tan ke taqaazon kaa kahaa maante hain Ruuh mar jaatee hai to jism hai chaltee huee laash Is haqeeqat ko samajhte hain na pahchaante hain Kitnee sadiyon se ye vahshat kaa chalan jaaree hai Kitnee sadiyon se hai qaa.em ye gunaahon kaa rivaaj Log aurat kee har ik cheekh ko naghma samjhe Vo qabeelon kaa zamaana ho ki shahron kaa rivaaj Jabr se nasl baDhe zulm se tan mel karen Ye amal ham men hai be-ilm parindon men nahin Ham jo insaanon kee tahzeeb liye phirte hain Ham saa vahshee koi jangal ke darindon men nahin Ik bujhee ruuh luTe jism ke Dhaanche men liye Sochtee hoon main kahaan jaa ke muqaddar phoDoon Main na zinda hoon ki marne kaa sahaaraa DhoonDoon Aur na murda hoon ki jiine ke ghamon se chhooToon Kaun batlaa.egaa mujh ko kise jaa kar poochhoon Zindagee qahr ke saanchon men Dhalegee kab tak Kab talak aankh na kholegaa zamaane kaa zameer Zulm aur jabr kee ye riit chalegee kab tak Log aurat ko faqat jism samajh lete hain Ruh bhi hoti hai us mein ye kahan sochte hain Ruh kya hoti hai is se unhen matlab hi nahin Wo to bas tan ke taqazon ka kaha mante hain Ruh mar jati hai to jism hai chalti hui lash Is haqiqat ko samajhte hain na pahchante hain Kitni sadiyon se ye wahshat ka chalan jari hai Kitni sadiyon se hai qaem ye gunahon ka riwaj Log aurat ki har ek chiKH ko naghma samjhe Wo qabilon ka zamana ho ki shahron ka riwaj Jabr se nasl baDhe zulm se tan mel karen Ye amal hum mein hai be-ilm parindon mein nahin Hum jo insanon ki tahzib liye phirte hain Hum sa wahshi koi jangal ke darindon mein nahin Ek bujhi ruh luTe jism ke Dhanche mein liye Sochti hun main kahan ja ke muqaddar phoDun Main na zinda hun ki marne ka sahaara DhunDun Aur na murda hun ki jine ke ghamon se chhuTun Kaun batlaega mujh ko kise ja kar puchhun Zindagi qahr ke sanchon mein Dhalegi kab tak Kab talak aankh na kholega zamane ka zamir Zulm aur jabr ki ye rit chalegi kab tak