mire giit

Mire sarkash taraane sun ke dunya ye samajhtee hai Ki shaayad mere dil ko ishq ke naghmon se nafrat hai Mujhe hangaama-e-jang-o-jadal men kaif miltaa hai Miree fitrat ko khoon-rezee ke afsaane se raghbat hai Miree dunya men kuch vaq.at nahin hai raqs o naghma kee Miraa mahboob naghma shor-e-aahang-e-baghaavat hai Magar ai kaash dekhen wo miree pur-soz raaton ko Main jab taaron pe nazren gaaD kar aansoo bahaataa hoon Tasavvur ban ke bhoolee vaardaaten yaad aatee hain To soz-o-dard kee shiddat se pahron tilmilaataa hoon Koee khawabon men khvaabeeda umangon ko jagaatee hai To apnee zindagee ko maut ke pahloo men paataa hoon Main shaa.er hoon mujhe fitrat ke nazzaaron se ulfat hai Miraa dil dushman-e-naghma-saraa.ee ho nahin saktaa Mujhe insaaniyat kaa dard bhee bakhshaa hai qudarat ne Miraa maqsad faqat sho.ala-navaa.ee ho nahin saktaa Javaan hoon main javaanee laghzishon kaa ek toofaan hai Miree baaton men rang-e-paarsaa.ee ho nahin saktaa Miree sarkash taraanon kee haqeeqat hai to itnee hai Ki jab main dekhtaa hoon bhuuk ke maare kisaanon ko Ghareebon muflison ko be-kason ko be-sahaaron ko Sisaktee naazneenon ko taDapte nau-javaanon ko Hukoomat ke tashaddud ko imaarat ke takabbur ko Kisee ke cheethaDon ko aur shahanshaahee khazaanon ko To dil taab-e-nashaat-e-bazm-e-ishrat laa nahin saktaa Main chaahoon bhee to khvaab-aavar taraane gaa nahin saktaa Mere sarkash tarane sun ke duniya ye samajhti hai Ki shayad mere dil ko ishq ke naghmon se nafrat hai Mujhe hangama-e-jang-o-jadal mein kaif milta hai Meri fitrat ko KHun-rezi ke afsane se raghbat hai Meri duniya mein kuch waqat nahin hai raqs o naghma ki Mera mahbub naghma shor-e-ahang-e-baghawat hai Magar ai kash dekhen wo meri pur-soz raaton ko Main jab taron pe nazren gaD kar aansu bahata hun Tasawwur ban ke bhuli wardaten yaad aati hain To soz-o-dard ki shiddat se pahron tilmilata hun Koi KHwabon mein KHwabida umangon ko jagati hai To apni zindagi ko maut ke pahlu mein pata hun Main shaer hun mujhe fitrat ke nazzaron se ulfat hai Mera dil dushman-e-naghma-sarai ho nahin sakta Mujhe insaniyat ka dard bhi baKHsha hai qudarat ne Mera maqsad faqat shoala-nawai ho nahin sakta Jawan hun main jawani laghzishon ka ek tufan hai Meri baaton mein rang-e-parsai ho nahin sakta Meri sarkash taranon ki haqiqat hai to itni hai Ki jab main dekhta hun bhuk ke mare kisanon ko Gharibon muflison ko be-kason ko be-sahaaron ko Sisakti nazninon ko taDapte nau-jawanon ko Hukumat ke tashaddud ko imarat ke takabbur ko Kisi ke chithaDon ko aur shahanshahi KHazanon ko To dil tab-e-nashat-e-bazm-e-ishrat la nahin sakta Main chahun bhi to KHwab-awar tarane ga nahin sakta