nuur jahaan ke mazaar par

Pahlu-e-shaah men ye dukhtar-e-jamhoor kee qabr Kitne gum-gashta fasaanon kaa pata detee hai Kitne khoon-rez haqaa.eq se uThaatee hai naqaab Kitnee kuchlee huee jaanon kaa pata detee hai Kaise maghroor shahanshaahon kee taskeen ke liye Saal-haa-saal haseenaaon ke baazaar lage Kaise bahkee huee nazron ke ta.ayyush ke liye Surkh mahlon men javaan jismon ke ambaar lage Kaise har shaakh se munh-band mahaktee kaliyaan Noch lee jaatee thiin taz.een-e-haram kee khaatir Aur murjhaa ke bhee aazaad na ho saktee thiin Zill-e-subhaan kee ulfat ke bharam kee khaatir Kaise ik fard ke honTon kee zaraa see jumbish Sard kar saktee thee be-laus vafaaon ke charaagh LuuT saktee thee damakte hue haathon kaa suhaag ToD saktee thee mai-e-ishq se labrez ayaagh Sahmee sahmee see fazaaon men ye veeraan marqad Itnaa khaamosh hai fariyaad-kunaan ho jaise Sard shaakhon men havaa cheekh rahi hai aaise Rooh-e-taqdees-o-wafa marsiyaan-khvaan ho jaise Too miree jaan mujhe hairat o hasrat se na dekh Ham men koi bhee jahaan-noor o jahaan-geer nahin Too mujhe chhoD ke Thukraa ke bhee jaa saktee hai Tere haathon men mire haath hain zanjeer nahin Pahlu-e-shah mein ye duKHtar-e-jamhur ki qabr Kitne gum-gashta fasanon ka pata deti hai Kitne KHun-rez haqaeq se uThati hai naqab Kitni kuchli hui jaanon ka pata deti hai Kaise maghrur shahanshahon ki taskin ke liye Sal-ha-sal hasinaon ke bazar lage Kaise bahki hui nazron ke tayyush ke liye SurKH mahlon mein jawan jismon ke ambar lage Kaise har shaKH se munh-band mahakti kaliyan Noch li jati thin tazin-e-haram ki KHatir Aur murjha ke bhi aazad na ho sakti thin Zill-e-subhan ki ulfat ke bharam ki KHatir Kaise ek fard ke honTon ki zara si jumbish Sard kar sakti thi be-laus wafaon ke charagh LuT sakti thi damakte hue hathon ka suhag ToD sakti thi mai-e-ishq se labrez ayagh Sahmi sahmi si fazaon mein ye viran marqad Itna KHamosh hai fariyaad-kunan ho jaise Sard shaKHon mein hawa chiKH rahi hai aaise Ruh-e-taqdis-o-wafa marsiyan-KHwan ho jaise Tu meri jaan mujhe hairat o hasrat se na dekh Hum mein koi bhi jahan-nur o jahan-gir nahin Tu mujhe chhoD ke Thukra ke bhi ja sakti hai Tere hathon mein mere hath hain zanjir nahin