parchhaaiyaan javaan raat ke siine pe duudhiyaa aanchal

Javaan raat ke siine pe doodhiyaa aanchal Machal raha hai kisee khvaab-e-marmareen kee tarah Haseen phuul haseen patiyaan haseen shaakhen Lachak rahi hain kisee jism-e-naazneen kee tarah Fazaa men ghul se ga.e hain ufuq ke narm khutoot Zameen haseen hai khawabon kee sarzameen kee tarah Tasavvuraat kee parchhaa.iyaan ubhartee hain Kabhee gumaan kee soorat kabhi yaqeen kee tarah Vo peD jin ke tale ham panaah lete the KhaDe hain aaj bhee saakit kisee amiin kee tarah Unhee ke saa.e men phir aaj do dhaDakte dil Khamosh honTon se kuch kahne sunne aa.e hain Na jaane kitnee kashaakash se kitnee kaavish se Ye sote jaagte lamhe churaa ke laa.e hain Yahee fazaa thee yahee rut yahee zamaana tha Yaheen se ham ne mohabbat kee ibtidaa kee thee DhaDakte dil se laraztee huee nigaahon se Huzoor-e-ghaib men nannhee see iltijaa kee thee Ki aarzoo ke kanval khil ke phuul ho jaa.en Dil-o-nazar kee duaa.en qubool ho jaa.en Tasavvuraat kee parchhaa.iyaan ubhartee hain Tum aa rahi ho zamaane kee aankh se bach kar Nazar jhukaa.e hue aur badan churaa.e hue Khud apne qadmon kee aahaT se jhenptee Dartee Khud apne saa.e kee jumbish se khauf khaa.e hue Tasavvuraat kee parchhaa.iyaan ubhartee hain Ravaan hai chhoTee see kashtee havaaon ke rukh par Nadee ke saaz pe mallaah giit gaataa hai Tumhaaraa jism har ik lahr ke jhakole se Miree khulee huee baahon men jhuul jaataa hai Tasavvuraat kee parchhaa.iyaan ubhartee hain Main phuul Taank raha hoon tumhaare joDe men Tumhaaree aankh masarrat se jhuktee jaatee hai Na jaane aaj main kya baat kahne vaalaa hoon Zabaan khushk hai awaaz ruktee jaatee hai Tasavvuraat kee parchhaa.iyaan ubhartee hain Mire gale men tumhaaree gudaaz baahen hain Tumhaare honTon pe mere labon ke saa.e hain Mujhe yaqeen hai ki ham ab kabhi na bichhDenge Tumhen gumaan ki ham mil ke bhee paraa.e hain Tasavvuraat kee parchhaa.iyaan ubhartee hain Mire palang pe bikhree huee kitaabon ko Adaa-e-ijz-o-karam se uThaa rahi ho tum Suhaag-raat jo Dholak pe gaa.e jaate hain Dabe suron men vahee giit gaa rahi ho tum Tasavvuraat kee parchhaa.iyaan ubhartee hain Vo lamhe kitne dilkash the wo ghaDiyaan kitnee pyaaree thiin Vo sehre kitne naazuk the wo laDiyaan kitnee pyaaree thiin Bastee kee har ik shaadaab galee khawabon kaa jazeera thee goyaa Har mauj-e-nafas har mauj-e-sabaa naghmon kaa zakheera thee goyaa Naagaah lahakte kheton se Taapon kee sadaa.en aane lageen Baarood kee bojhal boo le kar pachchhim se havaa.en aane lageen Ta.ameer ke raushan chehre par takhreeb kaa baadal phail gaya Har gaanv men vahshat naach uThee har shahr men jangal phail gaya Maghrib ke mohazzab mulkon se kuch khaakee-vardee-posh aa.e IThlaate hue maghroor aa.e lahraate hue mad.hosh aa.e Khaamosh zameen ke siine men khemon kee tanaaben gaDne lageen Makkhan see mulaa.em raahon par booTon kee kharaashen paDne lageen Faujon ke bhayaanak band tale charkhon kee sadaa.en Doob ga.iin Jeepon kee sulagtee dhuul tale phoolon kee qabaa.en Doob ga.iin Insaan kee qismat girne lagee ajnaas ke bhaav chaDhne lage Chaupaal kee raunaq ghuTne lagee bhartee ke dafaatir baDhne lage Bastee ke sajeele shokh javaan ban ban ke sipaahee jaane lage Jis raah se kam hee lauT sake us raah pe raahee jaane lage Un jaane vaale daston men ghairat bhee ga.ee barnaa.ee bhee Maaon ke javaan beTe bhee ga.e bahnon ke chahete bhaa.ee bhee Bastee pe udaasee chhaane lagee melon kee bahaaren khatm huiin Aamon kee lachaktee shaakhon se jhoolon kee qataaren khatm huiin Dhuul uDne lagee baazaaron men bhuuk ugne lagee khaliyaanon men Har chiiz dukaanon se uTh kar roo-posh huee tah-khaanon men Bad-haal gharon kee bad-halee baDhte baDhte janjaal banee Mahngaa.ee baDh kar kaal banee saaree bastee kangaal banee Charvaahiyaan rasta bhuul ga.iin panhaariyaan panghaT chhoD ga.iin Kitnee hee kunvaaree ablaa.en maan baap kee chaukhaT chhoD ga.iin Aflaas-zada dahqaanon ke hal bail bike khaliyaan bike Jiine kee tamannaa ke haathon jiine ke sab saamaan bike Kuchh bhee na raha jab bikne ko jismon kee tijaarat hone lagee Khalvat men bhee jo mamnooa thee wo jalvat men jasaarat hone lagee Tasavvuraat kee parchhaa.iyaan ubhartee hain Tum aa rahi ho sar-e-shaam baal bikhraa.e Hazaar-goona malaamat kaa baar uThaa.e hue Havas-parast nigaahon kee cheera-dastee se Badan kee jhenptee uryaaniyaan chhupaa.e hue Tasavvuraat kee parchhaa.iyaan ubhartee hain Main shahr jaa ke har ik dar pe jhaank aayaa hoon Kisee jagah miree mehnat kaa mol mil na sakaa Sitamgaron ke siyaasee qimaar-khaane men Alam-naseeb faraasat kaa mol mil na sakaa Tasavvuraat kee parchhaa.iyaan ubhartee hain Tumhaare ghar men qayaamat kaa shor barpaa hai Mahaaz-e-jang se harkaara taar laayaa hai Ki jis kaa zikr tumhen zindagee se pyaaraa tha Vo bhaa.ee nargha-e-dushman men kaam aayaa hai Tasavvuraat kee parchhaa.iyaan ubhartee hain Har ek gaam pe bad-naamiyon kaa jamghaT hai Har ek moD pe rusvaa.iyon ke mele hain Na dostee na takalluf na dilbaree na khuloos Kisee kaa koi nahin aaj sab akele hain Tasavvuraat kee parchhaa.iyaan ubhartee hain Vo rahguzar jo mire dil kee tarah suunee hai Na jaane tum ko kahaan le ke jaane vaalee hai Tumhen khareed rahe hain zameer ke qaatil Ufuq pe khoon-e-tamannaa-e-dil kee laalee hai Tasavvuraat kee parchhaa.iyaan ubhartee hain Sooraj ke lahoo men lithDee huee wo shaam hai ab tak yaad mujhe Chaahat ke sunahre khawabon kaa anjaam hai ab tak yaad mujhe Us shaam mujhe maaloom huaa kheton kee tarah is dunya men Sahmee huee do-sheezaaon kee muskaan bhee bechee jaatee hai Us shaam mujhe maaloom huaa is kaar-gah-e-zardaaree men Do bholee-bhaalee roohon kee pahchaan bhee bechee jaatee hai Us shaam mujhe maaloom huaa jab baap kee khetee chhin jaa.e Mamtaa ke sunahre khawabon kee anmol nishaanee biktee hai Us shaam mujhe maaloom huaa jab bhaa.ee jang men kaam aa.en Sarmaa.e ke qahba-khaane men bahnon kee javaanee biktee hai Sooraj ke lahoo men lithDee huee wo shaam hai ab tak yaad mujhe Chaahat ke sunahre khawabon kaa anjaam hai ab tak yaad mujhe Tum aaj hazaaron miil yahaan se duur kaheen tanhaa.ee men Yaa bazm-e-tarab-aaraa.ee men Mere sapne buntee hongee baiThee aaghosh paraa.ee men Aur main siine men gham le kar din-raat mashaqqat kartaa hoon Jiine kee khaatir martaa hoon Apne fan ko rusvaa kar ke aghyaar kaa daaman bhartaa hoon Majboor hoon main majboor ho tum majboor ye dunya saaree hai Tan kaa dukh man par bhaaree hai Is daur men jiine kee qeemat yaa daar-o-rasan yaa khvaaree hai Main daar-o-rasan tak jaa na sakaa tum jehd kee had tak aa na sakeen Chaahaa to magar apna na sakeen Ham to do aisi roohen hain jo manzil-e-taskeen paa na saken Jiine ko jiye jaate hain magar saanson men chitaaen jaltee hain Khaamosh wafa.en jaltee hain Sangeen haqaa.iq-zaaron men khawabon kee ridaa.en jaltee hain Aur aaj jab in peDon ke tale phir do saa.e lahraa.e hain Phir do dil milne aa.e hain Phir maut kee aandhee uTThee hai phir jang ke baadal chhaa.e hain Main soch raha hoon in kaa bhee apnee hee tarah anjaam na ho In kaa bhee junoon naakaam na ho In ke bhee muqaddar men likhee ik Khoon men lithDee shaam na ho Sooraj ke lahoo men lithDee huee wo shaam hai ab tak yaad mujhe Chaahat ke sunahre khawabon kaa anjaam hai ab tak yaad mujhe Hamaaraa pyaar havaadis kee taab laa na sakaa Magar unhen to muraadon kee raat mil jaa.e Hamen to kashmakash-e-marg-e-be-amaan hee milee Unhen to jhoomtee gaatee hayaat mil jaa.e Bahut dinon se hai ye mashghala siyaasat kaa Ki jab javaan hon bachche to qatl ho jaa.en Bahut dinon se ye hai khabt hukmaraanon kaa Ki duur duur ke mulkon men qaht bo jaa.en Bahut dinon se javaanee ke khvaab veeraan hain Bahut dinon se sitam-deeda shaah-raahon men Nigaar-e-zeest kee ismat panaah DhoonDhtee hai Chalo ki aaj sabhee paa.emaal roohon se Kahen ki apne har ik zakhm ko zabaan kar len Hamaaraa raaz hamaaraa nahin sabhee kaa hai Chalo ki saare zamaane ko raaz-daan kar len Chalo ki chal ke siyaasee muqaamiron se kahen Ki ham ko jang-o-jadal ke chalan se nafrat hai Jise lahoo ke sivaa koi rang raas na aa.e Hamen hayaat ke us pairahan se nafrat hai Kaho ki ab koi qaatil agar idhar aayaa To har qadam pe zameen tang hotee jaa.egee Har ek mauj-e-havaa rukh badal ke jhapTegee Har ek shaakh rag-e-sang hotee jaa.egee UTho ki aaj har ik jang-joo se ye kah den Ki ham ko kaam kee khaatir kalon kee haajat hai Hamen kisee kee zameen chheenne kaa shauq nahin Hamen to apnee zameen par halon kee haajat hai Kaho ki ab koi taajir idhar kaa rukh na kare Ab is jagah koi kunvaaree na bechee jaa.egee Ye khet jaag paDe uTh khaDee huiin faslen Ab is jagah koi kyaaree na bechee jaa.egee Ye sar-zameen hai gautam kee aur naanak kee Is arz-e-paak pe vahshee na chal sakenge kabhi Hamaaraa Khoon amaanat hai nasl-e-nau ke liye Hamaare Khoon pe lashkar na pal sakenge kabhi Kaho ki aaj bhee ham sab agar khamosh rahe To is damakte hue khaak-daan kee khair nahin Junoon kee Dhaalee huee atomee balaaon se Zameen kee khair nahin aasmaan kee khair nahin Guzishta jang men ghar hee jale magar is baar Ajab nahin ki ye tanhaa.iyaan bhee jal jaa.en Guzishta jang men paikar jale magar is baar Ajab nahin ki ye parchhaa.iyaan bhee jal jaa.en Tasavvuraat kee parchhaa.iyaan ubhartee hain Jawan raat ke sine pe dudhiya aanchal Machal raha hai kisi KHwab-e-marmarin ki tarah Hasin phul hasin patiyan hasin shaKHen Lachak rahi hain kisi jism-e-naznin ki tarah Faza mein ghul se gae hain ufuq ke narm KHutut Zamin hasin hai KHwabon ki sarzamin ki tarah Tasawwuraat ki parchhaiyan ubharti hain Kabhi guman ki surat kabhi yaqin ki tarah Wo peD jin ke tale hum panah lete the KhaDe hain aaj bhi sakit kisi amin ki tarah Unhi ke sae mein phir aaj do dhaDakte dil KHamosh honTon se kuch kahne sunne aae hain Na jaane kitni kashakash se kitni kawish se Ye sote jagte lamhe chura ke lae hain Yahi faza thi yahi rut yahi zamana tha Yahin se hum ne mohabbat ki ibtida ki thi DhaDakte dil se larazti hui nigahon se Huzur-e-ghaib mein nannhi si iltija ki thi Ki aarzu ke kanwal khil ke phul ho jaen Dil-o-nazar ki duaen qubul ho jaen Tasawwuraat ki parchhaiyan ubharti hain Tum aa rahi ho zamane ki aankh se bach kar Nazar jhukae hue aur badan churae hue KHud apne qadmon ki aahaT se jhenpti Darti KHud apne sae ki jumbish se KHauf khae hue Tasawwuraat ki parchhaiyan ubharti hain Rawan hai chhoTi si kashti hawaon ke ruKH par Nadi ke saz pe mallah git gata hai Tumhaara jism har ek lahr ke jhakole se Meri khuli hui bahon mein jhul jata hai Tasawwuraat ki parchhaiyan ubharti hain Main phul Tank raha hun tumhaare joDe mein Tumhaari aankh masarrat se jhukti jati hai Na jaane aaj main kya baat kahne wala hun Zaban KHushk hai aawaz rukti jati hai Tasawwuraat ki parchhaiyan ubharti hain Mere gale mein tumhaari gudaz bahen hain Tumhaare honTon pe mere labon ke sae hain Mujhe yaqin hai ki hum ab kabhi na bichhDenge Tumhein guman ki hum mil ke bhi parae hain Tasawwuraat ki parchhaiyan ubharti hain Mere palang pe bikhri hui kitabon ko Ada-e-ijz-o-karam se uTha rahi ho tum Suhag-raat jo Dholak pe gae jate hain Dabe suron mein wahi git ga rahi ho tum Tasawwuraat ki parchhaiyan ubharti hain Wo lamhe kitne dilkash the wo ghaDiyan kitni pyari thin Wo sehre kitne nazuk the wo laDiyan kitni pyari thin Basti ki har ek shadab gali KHwabon ka jazira thi goya Har mauj-e-nafas har mauj-e-saba naghmon ka zaKHira thi goya Nagah lahakte kheton se Tapon ki sadaen aane lagin Barud ki bojhal bu le kar pachchhim se hawaen aane lagin Tamir ke raushan chehre par taKHrib ka baadal phail gaya Har ganw mein wahshat nach uThi har shahr mein jangal phail gaya Maghrib ke mohazzab mulkon se kuch KHaki-wardi-posh aae IThlate hue maghrur aae lahraate hue madhosh aae KHamosh zamin ke sine mein KHemon ki tanaben gaDne lagin Makkhan si mulaem rahon par buTon ki KHarashen paDne lagin Faujon ke bhayanak band tale charKHon ki sadaen Dub gain Jipon ki sulagti dhul tale phulon ki qabaen Dub gain Insan ki qismat girne lagi ajnas ke bhaw chaDhne lage Chaupal ki raunaq ghuTne lagi bharti ke dafatir baDhne lage Basti ke sajile shoKH jawan ban ban ke sipahi jaane lage Jis rah se kam hi lauT sake us rah pe rahi jaane lage Un jaane wale daston mein ghairat bhi gai barnai bhi Maon ke jawan beTe bhi gae bahnon ke chahete bhai bhi Basti pe udasi chhane lagi melon ki bahaaren KHatm huin Aamon ki lachakti shaKHon se jhulon ki qataren KHatm huin Dhul uDne lagi bazaron mein bhuk ugne lagi khaliyanon mein Har chiz dukanon se uTh kar ru-posh hui tah-KHanon mein Bad-haal gharon ki bad-hali baDhte baDhte janjal bani Mahngai baDh kar kal bani sari basti kangal bani Charwahiyan rasta bhul gain panhaariyan panghaT chhoD gain Kitni hi kunwari ablaen man bap ki chaukhaT chhoD gain Aflas-zada dahqanon ke hal bail bike khaliyan bike Jine ki tamanna ke hathon jine ke sab saman bike Kuchh bhi na raha jab bikne ko jismon ki tijarat hone lagi KHalwat mein bhi jo mamnua thi wo jalwat mein jasarat hone lagi Tasawwuraat ki parchhaiyan ubharti hain Tum aa rahi ho sar-e-sham baal bikhrae Hazar-guna malamat ka bar uThae hue Hawas-parast nigahon ki chira-dasti se Badan ki jhenpti uryaniyan chhupae hue Tasawwuraat ki parchhaiyan ubharti hain Main shahr ja ke har ek dar pe jhank aaya hun Kisi jagah meri mehnat ka mol mil na saka Sitamgaron ke siyasi qimar-KHane mein Alam-nasib farasat ka mol mil na saka Tasawwuraat ki parchhaiyan ubharti hain Tumhaare ghar mein qayamat ka shor barpa hai Mahaz-e-jang se harkara tar laya hai Ki jis ka zikr tumhein zindagi se pyara tha Wo bhai nargha-e-dushman mein kaam aaya hai Tasawwuraat ki parchhaiyan ubharti hain Har ek gam pe bad-namiyon ka jamghaT hai Har ek moD pe ruswaiyon ke mele hain Na dosti na takalluf na dilbari na KHulus Kisi ka koi nahin aaj sab akele hain Tasawwuraat ki parchhaiyan ubharti hain Wo rahguzar jo mere dil ki tarah suni hai Na jaane tum ko kahan le ke jaane wali hai Tumhein KHarid rahe hain zamir ke qatil Ufuq pe KHun-e-tamanna-e-dil ki lali hai Tasawwuraat ki parchhaiyan ubharti hain Suraj ke lahu mein lithDi hui wo sham hai ab tak yaad mujhe Chahat ke sunahre KHwabon ka anjam hai ab tak yaad mujhe Us sham mujhe malum hua kheton ki tarah is duniya mein Sahmi hui do-shizaon ki muskan bhi bechi jati hai Us sham mujhe malum hua is kar-gah-e-zardari mein Do bholi-bhaali ruhon ki pahchan bhi bechi jati hai Us sham mujhe malum hua jab bap ki kheti chhin jae Mamta ke sunahre KHwabon ki anmol nishani bikti hai Us sham mujhe malum hua jab bhai jang mein kaam aaen Sarmae ke qahba-KHane mein bahnon ki jawani bikti hai Suraj ke lahu mein lithDi hui wo sham hai ab tak yaad mujhe Chahat ke sunahre KHwabon ka anjam hai ab tak yaad mujhe Tum aaj hazaron mil yahan se dur kahin tanhai mein Ya bazm-e-tarab-arai mein Mere sapne bunti hongi baiThi aaghosh parai mein Aur main sine mein gham le kar din-raat mashaqqat karta hun Jine ki KHatir marta hun Apne fan ko ruswa kar ke aghyar ka daman bharta hun Majbur hun main majbur ho tum majbur ye duniya sari hai Tan ka dukh man par bhaari hai Is daur mein jine ki qimat ya dar-o-rasan ya KHwari hai Main dar-o-rasan tak ja na saka tum jehd ki had tak aa na sakin Chaha to magar apna na sakin Hum to do aisi ruhen hain jo manzil-e-taskin pa na saken Jine ko jiye jate hain magar sanson mein chitaen jalti hain KHamosh wafaen jalti hain Sangin haqaiq-zaron mein KHwabon ki ridaen jalti hain Aur aaj jab in peDon ke tale phir do sae lahrae hain Phir do dil milne aae hain Phir maut ki aandhi uTThi hai phir jang ke baadal chhae hain Main soch raha hun in ka bhi apni hi tarah anjam na ho In ka bhi junun nakaam na ho In ke bhi muqaddar mein likhi ek KHun mein lithDi sham na ho Suraj ke lahu mein lithDi hui wo sham hai ab tak yaad mujhe Chahat ke sunahre KHwabon ka anjam hai ab tak yaad mujhe Hamara pyar hawadis ki tab la na saka Magar unhen to muradon ki raat mil jae Hamein to kashmakash-e-marg-e-be-aman hi mili Unhen to jhumti gati hayat mil jae Bahut dinon se hai ye mashghala siyasat ka Ki jab jawan hon bachche to qatl ho jaen Bahut dinon se ye hai KHabt hukmaranon ka Ki dur dur ke mulkon mein qaht bo jaen Bahut dinon se jawani ke KHwab viran hain Bahut dinon se sitam-dida shah-rahon mein Nigar-e-zist ki ismat panah DhunDhti hai Chalo ki aaj sabhi paemal ruhon se Kahen ki apne har ek zaKHm ko zaban kar len Hamara raaz hamara nahin sabhi ka hai Chalo ki sare zamane ko raaz-dan kar len Chalo ki chal ke siyasi muqamiron se kahen Ki hum ko jang-o-jadal ke chalan se nafrat hai Jise lahu ke siwa koi rang ras na aae Hamein hayat ke us pairahan se nafrat hai Kaho ki ab koi qatil agar idhar aaya To har qadam pe zamin tang hoti jaegi Har ek mauj-e-hawa ruKH badal ke jhapTegi Har ek shaKH rag-e-sang hoti jaegi UTho ki aaj har ek jang-ju se ye kah den Ki hum ko kaam ki KHatir kalon ki hajat hai Hamein kisi ki zamin chhinne ka shauq nahin Hamein to apni zamin par halon ki hajat hai Kaho ki ab koi tajir idhar ka ruKH na kare Ab is jagah koi kunwari na bechi jaegi Ye khet jag paDe uTh khaDi huin faslen Ab is jagah koi kyari na bechi jaegi Ye sar-zamin hai gautam ki aur nanak ki Is arz-e-pak pe wahshi na chal sakenge kabhi Hamara KHun amanat hai nasl-e-nau ke liye Hamare KHun pe lashkar na pal sakenge kabhi Kaho ki aaj bhi hum sab agar KHamosh rahe To is damakte hue KHak-dan ki KHair nahin Junun ki Dhaali hui atomi balaon se Zamin ki KHair nahin aasman ki KHair nahin Guzishta jang mein ghar hi jale magar is bar Ajab nahin ki ye tanhaiyan bhi jal jaen Guzishta jang mein paikar jale magar is bar Ajab nahin ki ye parchhaiyan bhi jal jaen Tasawwuraat ki parchhaiyan ubharti hain