virsa

Ye vatan teree miree nasl kee jaageer nahin SainkaDon naslon kee mehnat ne sanvaaraa hai ise Kitne zehnon kaa lahoo kitnee nigaahon kaa araq Kitne chehron kee hayaa kitnee jabeenon kee shafaq Khaak kee nazr huee tab ye nazaare bikhre Pattharon se ye taraashe hue asnaam-e-javaan Ye sadaaon ke kham-o-pech ye rangon kee zabaan Chimniyon se ye nikaltaa huaa pur-pech dhuaan Teree takhleeq nahin hai miree takhleeq nahin Ham agar zid bhee karen us pe to tasdeeq nahin Ilm suulee pe chaDhaa tab kaheen takhmeena banaa Zahr sadiyon ne piyaa tab kaheen nausheena banaa SainkaDon paanv kaTe tab kaheen ik ziina banaa Tere qadmon ke tale yaa mire qadmon ke tale Nau-e-insaan ke shab-o-roz kee taqdeer nahin Ye vatan teree miree nasl kee jaageer nahin SainkaDon naslon kee mehnat ne sanvaaraa hai ise Teraa gham kuch bhee sahee meraa alam kuch bhee sahee Ahl-e-sarvat kee siyaasat kaa sitam kuch bhee sahee Kal kee naslen bhee koi chiiz hain ham kuch bhee sahee Un kaa virsa hoon khanDar ye sitam eejaad na kar Teree takhleeq nahin too ise barbaad na kar Jis se dahqaan ko rozee nahin milne paatee Main na doongaa tujhe wo khet jalaane kaa sabaq Fasl baaqee hai to taqseem badal saktee hai Fasl kee khaak se kya maangegaa jamhoor kaa haq Pal salaamat hai to too paar utar saktaa hai Chaahe tableegh baghaavat ke liye hee utre Varna 'ghaalib' kee zabaan men mire hamdam mire dost Daam har mauj men hai halqa-e-sad-kaam-e-nahang Soch le phir koi ta.ameer giraane jaanaa Teree ta.ameer se hai jang ki takhreeb se jang Ahal-e-mansab hain ghalat-kaar to un ke mansab Teree taa.eed se Dhaale ga.e to mujrim hai Meree taa.eed se Dhaale ga.e main mujrim hoon PaTriyaan rail kee saDkon kee basen phone ke taar Teree aur meree khataaon kee sazaa kyuun bugten Un pe kyuun zulm ho jin kee koi taqseer nahin Ye vatan teree miree nasl kee jaageer nahin SainkaDon naslon kee mehnat ne sanvaaraa hai ise Teraa shikva bhee bajaa meree shikaayat bhee durust Rang-e-maahaul badalne kee zaroorat bhee durust Kaun kahtaa hai ki haalaat pe tanqeed na kar Hukmaraanon ke ghalat da.avon kee tardeed na kar Tujh ko iz.haar-e-khayaalaat kaa haq haasil hai Aur ye haq koi taareekh kee khairaat nahin Tere aur mere rafeeqon ne lahoo de de kar Zulm kee khaak men is haq kaa shajar boyaa tha Saalhaa-saal men jo barg-o-samar laayaa hai Apnaa haq maang magar un ke ta.aavun se na maang Jo tire haq kaa tasavvur hee fanaa kar Daalen Haath uThaa apne magar un ke jilau men na uThaa Jo tire haath tire tan se judaa kar Daalen Khvaab-e-aazaadee insaan kee ye ta.abeer nahin Ye vatan teree miree nasl kee jaageer nahin SainkaDon naslon kee mehnat ne sanvaaraa hai use Ye watan teri meri nasl ki jagir nahin SainkaDon naslon ki mehnat ne sanwara hai ise Kitne zehnon ka lahu kitni nigahon ka araq Kitne chehron ki haya kitni jabinon ki shafaq KHak ki nazr hui tab ye nazare bikhre Pattharon se ye tarashe hue asnam-e-jawan Ye sadaon ke KHam-o-pech ye rangon ki zaban Chimniyon se ye nikalta hua pur-pech dhuan Teri taKHliq nahin hai meri taKHliq nahin Hum agar zid bhi karen us pe to tasdiq nahin Ilm suli pe chaDha tab kahin taKHmina bana Zahr sadiyon ne piya tab kahin naushina bana SainkaDon panw kaTe tab kahin ek zina bana Tere qadmon ke tale ya mere qadmon ke tale Nau-e-insan ke shab-o-roz ki taqdir nahin Ye watan teri meri nasl ki jagir nahin SainkaDon naslon ki mehnat ne sanwara hai ise Tera gham kuch bhi sahi mera alam kuch bhi sahi Ahl-e-sarwat ki siyasat ka sitam kuch bhi sahi Kal ki naslen bhi koi chiz hain hum kuch bhi sahi Un ka wirsa hun khanDar ye sitam ijad na kar Teri taKHliq nahin tu ise barbaad na kar Jis se dahqan ko rozi nahin milne pati Main na dunga tujhe wo khet jalane ka sabaq Fasl baqi hai to taqsim badal sakti hai Fasl ki KHak se kya mangega jamhur ka haq Pal salamat hai to tu par utar sakta hai Chahe tabligh baghawat ke liye hi utre Warna 'ghaalib' ki zaban mein mere hamdam mere dost Dam har mauj mein hai halqa-e-sad-kaam-e-nahang Soch le phir koi tamir girane jaana Teri tamir se hai jang ki taKHrib se jang Ahal-e-mansab hain ghalat-kar to un ke mansab Teri taid se Dhaale gae to mujrim hai Meri taid se Dhaale gae main mujrim hun PaTriyan rail ki saDkon ki basen phone ke tar Teri aur meri KHataon ki saza kyun bugten Un pe kyun zulm ho jin ki koi taqsir nahin Ye watan teri meri nasl ki jagir nahin SainkaDon naslon ki mehnat ne sanwara hai ise Tera shikwa bhi baja meri shikayat bhi durust Rang-e-mahaul badalne ki zarurat bhi durust Kaun kahta hai ki haalat pe tanqid na kar Hukmaranon ke ghalat dawon ki tardid na kar Tujh ko izhaar-e-KHayalat ka haq hasil hai Aur ye haq koi tariKH ki KHairaat nahin Tere aur mere rafiqon ne lahu de de kar Zulm ki KHak mein is haq ka shajar boya tha Salha-sal mein jo barg-o-samar laya hai Apna haq mang magar un ke taawun se na mang Jo tere haq ka tasawwur hi fana kar Dalen Hath uTha apne magar un ke jilau mein na uTha Jo tere hath tere tan se juda kar Dalen KHwab-e-azadi insan ki ye tabir nahin Ye watan teri meri nasl ki jagir nahin SainkaDon naslon ki mehnat ne sanwara hai use