kaise hangaama e fursat men mile hain tujh se

Kaise hangaama-e-fursat men mile hain tujh se Ham bhare shahr kee khalvat men mile hain tujh se Saa.e se saayaa guzartaa huaa mahsoos huaa Ik ajab khvaab kee hairat men mile hain tujh se Itnaa shaffaaf nahin hai abhee aks-e-dil-o-jaan Aa.ine gard-e-masaafat men mile hain tujh se Is qadar tang nahin vus.at-e-sahraa-e-jahaan Ham to ik aur hee vahshat men mile hain tujh se Juz gham-e-'ishq koi kaam nahin hai so ai husn Jab mile ik na.ee haalat men mile hain tujh se Vaqt kaa sail-e-ravaan rok hee lenge shaayad Vo jo phir milne kee hasrat men mile hain tujh se Itnaa khush-fahm na ho apnee pazeeraa.ee par Ham kisee aur mohabbat men mile hain tujh se Yaad kaa zakhm bhee ham tujh ko nahin de sakte Dekh kis aalam-e-ghurbat men mile hain tujh se Ab agar lauT ke aa.e to zaraa Thahrenge Ham musaafir hain so ujlat men mile hain tujh se Kaise hangama-e-fursat mein mile hain tujh se Hum bhare shahr ki KHalwat mein mile hain tujh se Sae se saya guzarta hua mahsus hua Ek ajab KHwab ki hairat mein mile hain tujh se Itna shaffaf nahin hai abhi aks-e-dil-o-jaan Aaine gard-e-masafat mein mile hain tujh se Is qadar tang nahin wusat-e-sahra-e-jahan Hum to ek aur hi wahshat mein mile hain tujh se Juz gham-e-'ishq koi kaam nahin hai so ai husn Jab mile ek nai haalat mein mile hain tujh se Waqt ka sail-e-rawan rok hi lenge shayad Wo jo phir milne ki hasrat mein mile hain tujh se Itna KHush-fahm na ho apni pazirai par Hum kisi aur mohabbat mein mile hain tujh se Yaad ka zaKHm bhi hum tujh ko nahin de sakte Dekh kis aalam-e-ghurbat mein mile hain tujh se Ab agar lauT ke aae to zara Thahrenge Hum musafir hain so ujlat mein mile hain tujh se