Kuch bhi thaa sach ke taraf daar huaa karte the
— Saleem Kausar
Kuch bhee thaa sach ke taraf-daar huaa karte the
Tum kabhi saahab-e-kirdaar huaa karte the
Sunte hain aisa zamaana bhee yahaan guzraa hai
Haq unhen miltaa jo haqdaar huaa karte the
Tujh ko bhee zo.am saa rahtaa thaa maseehaa.ee kaa
Aur ham bhee tire beemaar huaa karte the
Ik nazar roz kaheen jaal bichhaa.e rakhtee
Aur ham roz giraftaar huaa karte the
Ham ko ma.aloom thaa aanaa to nahin tujh ko magar
Tere aane ke to aasaar huaa karte the
Ishq karte the faqat paas-e-wafa rakhne ko
Log sach-much ke vafaadaar huaa karte the
Aa.eena khud bhee sanvartaa thaa hamaaree khaatir
Ham tire vaaste tayyaar huaa karte the
Ham gul-e-khvaab sajaate the dukaan-e-dil men
Aur phir khud hee khareedaar huaa karte the
Koocha-e-'meer' kee jaanib nikal aate the sabhee
Vo jo 'ghaalib' ke taraf-daar huaa karte the
Jin se aavaargee-e-shab kaa bharam thaa wo log
Is bhare shahr men do-chaar huaa karte the
Ye jo zindaan men tumhen saa.e nazar aate hain
Ye kabhi raunaq-e-darbaar huaa karte the
Main sar-e-dasht-e-wafa ab hoon akelaa varna
Mere ham-raah mire yaar huaa karte the
Vaqt ruk ruk ke jinhen dekhtaa rahtaa hai 'saleem'
Ye kabhi vaqt kee raftaar huaa karte the
Kuchh bhi tha sach ke taraf-dar hua karte the
Tum kabhi sahab-e-kirdar hua karte the
Sunte hain aisa zamana bhi yahan guzra hai
Haq unhen milta jo haqdar hua karte the
Tujh ko bhi zoam sa rehta tha masihai ka
Aur hum bhi tere bimar hua karte the
Ek nazar roz kahin jal bichhae rakhti
Aur hum roz giraftar hua karte the
Hum ko malum tha aana to nahin tujh ko magar
Tere aane ke to aasar hua karte the
Ishq karte the faqat pas-e-wafa rakhne ko
Log sach-much ke wafadar hua karte the
Aaina KHud bhi sanwarta tha hamari KHatir
Hum tere waste tayyar hua karte the
Hum gul-e-KHwab sajate the dukan-e-dil mein
Aur phir KHud hi KHaridar hua karte the
Kucha-e-'mir' ki jaanib nikal aate the sabhi
Wo jo 'ghaalib' ke taraf-dar hua karte the
Jin se aawargi-e-shab ka bharam tha wo log
Is bhare shahr mein do-chaar hua karte the
Ye jo zindan mein tumhein sae nazar aate hain
Ye kabhi raunaq-e-darbar hua karte the
Main sar-e-dasht-e-wafa ab hun akela warna
Mere ham-rah mere yar hua karte the
Waqt ruk ruk ke jinhen dekhta rehta hai 'salim'
Ye kabhi waqt ki raftar hua karte the