wo jo aae the bahut mansab o jaagiir ke saath

Wo jo aa.e the bahut mansab-o-jaageer ke saath Kaise chup-chaap khaDe hain tiree tasveer ke saath Sirf zindaan kee hikaayat hee pe ma.amoor nahin Ek taareekh safar kartee hai zanjeer ke saath Ab ke sooraj kee rihaa.ee men baDee der lagee Varna main ghar se nikaltaa nahin taakheer ke saath Tujh ko qismat se to main jiit chukaa hoon kab kaa Shaayad ab ke mujhe laDnaa paDe taqdeer ke saath Ab kisee aur gavaahee kee zaroorat hee nahin Jurm khud bol raha hai tiree tahreer ke saath Dekhte Kuch hain dikhaate hamen Kuch hain ki yahaan Koee rishta hee nahin khvaab kaa taabeer ke saath Ab jahaan teree imaarat kee haden miltee hain Ek buDhiyaa kaa makaan thaa usee jaageer ke saath Ye to honaa hee thaa mahtaab-e-tamaashaa phir bhee Kitne dil Toot ga.e hain tiree taskheer ke saath Yaad bhee abr-e-mohabbat kee tarah hotee hai Ek saayaa saa chalaa jaataa hai rahgeer ke saath Wo jo aae the bahut mansab-o-jagir ke sath Kaise chup-chap khaDe hain teri taswir ke sath Sirf zindan ki hikayat hi pe mamur nahin Ek tariKH safar karti hai zanjir ke sath Ab ke suraj ki rihai mein baDi der lagi Warna main ghar se nikalta nahin taKHir ke sath Tujh ko qismat se to main jit chuka hun kab ka Shayad ab ke mujhe laDna paDe taqdir ke sath Ab kisi aur gawahi ki zarurat hi nahin Jurm KHud bol raha hai teri tahrir ke sath Dekhte Kuch hain dikhate hamein Kuch hain ki yahan Koi rishta hi nahin KHwab ka tabir ke sath Ab jahan teri imarat ki haden milti hain Ek buDhiya ka makan tha usi jagir ke sath Ye to hona hi tha mahtab-e-tamasha phir bhi Kitne dil TuT gae hain teri tasKHir ke sath Yaad bhi abr-e-mohabbat ki tarah hoti hai Ek saya sa chala jata hai rahgir ke sath