aayaa hai har chadhaaii ke baad ik utaar bhi

Aayaa hai har chaDhaa.ee ke ba.ad ik utaar bhee Pastee se ham-kanaar mile kohsaar bhee Aakhir ko thak ke baith ga.ee ik maqaam par Kuchh duur mere saath chalee rahguzaar bhee Dil kyuun dhaDakne lagtaa hai ubhre jo koi chaap Ab to nahin kisee kaa mujhe intizaar bhee Jab bhee sukoot-e-shaam men aayaa tiraa khayaal Kuchh der ko Thahar saa gaya aabshaar bhee Kuchh ho gaya hai dhoop se khaakistaree badan Kuchh jam gaya hai raah kaa mujh par ghubaar bhee Is faaslon ke dasht men rahbar vahee bane Jis kee nigaah dekh le sadiyon ke paar bhee Ai dost pahle qurb kaa nashsha ajiib thaa Main sun sakaa na apne badan kee pukaar bhee Rasta bhee vaapsee kaa kaheen ban men kho gaya Ojhal huee nigaah se hirnon kee Daar bhee Kyuun ro rahe ho raah ke andhe charaagh ko Kyaa bujh gaya havaa se lahoo kaa sharaar bhee Kuchh aql bhee hai baa.is-e-tauqeer ai 'shakeb' Kuchh aa ga.e hain baalon men chaandee ke taar bhee Aaya hai har chaDhai ke baad ek utar bhi Pasti se ham-kanar mile kohsar bhi AaKHir ko thak ke baith gai ek maqam par Kuchh dur mere sath chali rahguzar bhi Dil kyun dhaDakne lagta hai ubhre jo koi chap Ab to nahin kisi ka mujhe intizar bhi Jab bhi sukut-e-sham mein aaya tera KHayal Kuchh der ko Thahar sa gaya aabshaar bhi Kuchh ho gaya hai dhup se KHakistari badan Kuchh jam gaya hai rah ka mujh par ghubar bhi Is faslon ke dasht mein rahbar wahi bane Jis ki nigah dekh le sadiyon ke par bhi Ai dost pahle qurb ka nashsha ajib tha Main sun saka na apne badan ki pukar bhi Rasta bhi wapsi ka kahin ban mein kho gaya Ojhal hui nigah se hirnon ki Dar bhi Kyun ro rahe ho rah ke andhe charagh ko Kya bujh gaya hawa se lahu ka sharar bhi Kuchh aql bhi hai bais-e-tauqir ai 'shakeb' Kuchh aa gae hain baalon mein chandi ke tar bhi