kanaar e aab khadaa khud se kah raha hai koi

Kanaar-e-aab khaDaa khud se kah raha hai koi Gumaan guzartaa hai ye shakhs doosraa hai koi Havaa ne toD ke patta zameen pe phenkaa hai Ki shab kee jhiil men patthar giraa diyaa hai koi BaTaa sake hain paDosee kisee kaa dard kabhi Yahee bahut hai ki chehre se aashnaa hai koi Darakht-e-raah bataa.en hilaa hilaa kar haath Ki qaafile se musaafir bichhaD gaya hai koi ChhuDaa ke haath bahut duur bah gaya hai chaand Kisee ke saath samundar men Doobtaa hai koi Ye aasmaan se TuuTaa huaa sitaara hai Ki dasht-e-shab men bhaTaktee huee sadaa hai koi Makaan aur nahin hai badal gaya hai makeen Ufuq vahee hai magar chaand doosraa hai koi Faseel-e-jism pe taaza lahoo ke chheenTe hain Hudood-e-vaqt se aage nikal gaya hai koi 'shakeb' diip se lahraa rahe hain palkon par Dayaar-e-chashm men kya aaj rat-jagaa hai koi Kanar-e-ab khaDa KHud se kah raha hai koi Guman guzarta hai ye shaKHs dusra hai koi Hawa ne toD ke patta zamin pe phenka hai Ki shab ki jhil mein patthar gira diya hai koi BaTa sake hain paDosi kisi ka dard kabhi Yahi bahut hai ki chehre se aashna hai koi DaraKHt-e-rah bataen hila hila kar hath Ki qafile se musafir bichhaD gaya hai koi ChhuDa ke hath bahut dur bah gaya hai chand Kisi ke sath samundar mein Dubta hai koi Ye aasman se TuTa hua sitara hai Ki dasht-e-shab mein bhaTakti hui sada hai koi Makan aur nahin hai badal gaya hai makin Ufuq wahi hai magar chand dusra hai koi Fasil-e-jism pe taza lahu ke chhinTe hain Hudud-e-waqt se aage nikal gaya hai koi 'shakeb' dip se lahra rahe hain palkon par Dayar-e-chashm mein kya aaj rat-jaga hai koi