khizaan ke chaand ne puuchhaa ye jhuk ke khidkii men

Khizaan ke chaand ne poochhaa ye jhuk ke khiDkee men Kabhee charaagh bhee jaltaa hai is havelee men Ye aadmee hain ki saa.e hain aadamiyyat ke Guzar huaa hai miraa kis ujaaD bastee men Jhukee chaTaan phisaltee giraft jhooltaa jism Main ab giraa hee giraa tang-o-taar ghaaTee men Zamaane bhar se niraalee hai aap kee mantiq Nadee ko paar kiyaa kis ne ulTee kashtee men Jalaa.e kyuun agar itne hee qeemtee the khutoot Kuredte ho abas raakh ab angeThee men Ajab nahin jo ugen yaan darakht paanee ke Ki ashk bo.e hain shab bhar kisee ne dhartee men Miree giraft men aa kar nikal ga.ee titlee Paron ke rang magar rah ga.e hain muTThee men Chaloge saath mire aagahee kee sarhad tak Ye rahguzaar utartee hai gahre paanee men Main apnee be-khabaree se 'shakeb' vaaqif hoon Bataao pech hain kitne tumhaaree pagDee men KHizan ke chand ne puchha ye jhuk ke khiDki mein Kabhi charagh bhi jalta hai is haweli mein Ye aadmi hain ki sae hain aadamiyyat ke Guzar hua hai mera kis ujaD basti mein Jhuki chaTan phisalti giraft jhulta jism Main ab gira hi gira tang-o-tar ghaTi mein Zamane bhar se nirali hai aap ki mantiq Nadi ko par kiya kis ne ulTi kashti mein Jalae kyun agar itne hi qimti the KHutut Kuredte ho abas rakh ab angeThi mein Ajab nahin jo ugen yan daraKHt pani ke Ki ashk boe hain shab bhar kisi ne dharti mein Meri giraft mein aa kar nikal gai titli Paron ke rang magar rah gae hain muTThi mein Chaloge sath mere aagahi ki sarhad tak Ye rahguzar utarti hai gahre pani mein Main apni be-KHabari se 'shakeb' waqif hun Batao pech hain kitne tumhaari pagDi mein