koi is dil kaa haal kya jaane
— Shakeb Jalali
Koi is dil kaa haal kya jaane
Ek khwaish hazaar tah-khaane
Maut ne aaj khud-kushee kar lee
Ziist par kya banee khuda jaane
Phir huaa koi bad-gumaan ham se
Phir janam le rahe hain afsaane
Vaqt ne ye kahaa hai ruk ruk kar
Aaj ke dost kal ke begaane
Duur se ek cheekh ubhree thee
Ban ga.e be-shumaar afsaane
Ziist ke shor-o-shar men Doob ga.e
Vaqt ko naapne ke paimaane
Kitnaa mushkil hai manzilon kaa husool
Kitne aasaan hain jaal phailaane
Raaz ye hai ki koi raaz nahin
Log phir bhee mujhe na pahchaane
Koi is dil ka haal kya jaane
Ek KHwahish hazar tah-KHane
Maut ne aaj KHud-kushi kar li
Zist par kya bani KHuda jaane
Phir hua koi bad-guman hum se
Phir janam le rahe hain afsane
Waqt ne ye kaha hai ruk ruk kar
Aaj ke dost kal ke begane
Dur se ek chiKH ubhri thi
Ban gae be-shumar afsane
Zist ke shor-o-shar mein Dub gae
Waqt ko napne ke paimane
Kitna mushkil hai manzilon ka husul
Kitne aasan hain jal phailane
Raaz ye hai ki koi raaz nahin
Log phir bhi mujhe na pahchane