main shaakh se udaa thaa sitaaron ki aas men

Main shaakh se uDaa thaa sitaaron kee aas men Murjhaa ke aa giraa hoon magar sard ghaas men Socho to silvaTon se bharee hai tamaam ruuh Dekho to ik shikan bhee nahin hai libaas men Sahraa kee bood-o-baash hai achchhee na kyuun lage Sookhee huee gulaab kee Tahnee gilaas men Chamke nahin nazar men abhee naqsh duur ke Masroof hoon abhee amal-e-in.ikaas men Dhoke se us haseen ko agar chuum bhee liyaa Paaoge dil kaa zahr labon kee miThaas men Taara koi ridaa-e-shab-e-abr men na thaa BaiThaa thaa main udaas bayaabaan-e-yaas men Joo-e-ravaan-e-dasht abhee sookhnaa nahin Saavan hai duur aur vahee shiddat hai pyaas men Rahtaa thaa saamne tiraa chehra khulaa huaa PaDhtaa thaa main kitaab yahee har class men KaanTon kee baaD phaand gaya thaa magar 'shakeb' Rasta na mil sakaa mujhe phoolon kee baas men Main shaKH se uDa tha sitaron ki aas mein Murjha ke aa gira hun magar sard ghas mein Socho to silwaTon se bhari hai tamam ruh Dekho to ek shikan bhi nahin hai libas mein Sahra ki bud-o-bash hai achchhi na kyun lage Sukhi hui gulab ki Tahni gilas mein Chamke nahin nazar mein abhi naqsh dur ke Masruf hun abhi amal-e-inikas mein Dhoke se us hasin ko agar chum bhi liya Paoge dil ka zahr labon ki miThas mein Tara koi rida-e-shab-e-abr mein na tha BaiTha tha main udas bayaban-e-yas mein Ju-e-rawan-e-dasht abhi sukhna nahin Sawan hai dur aur wahi shiddat hai pyas mein Rahta tha samne tera chehra khula hua PaDhta tha main kitab yahi har class mein KanTon ki baD phand gaya tha magar 'shakeb' Rasta na mil saka mujhe phulon ki bas mein