vahii jhukii huii belen vahii dariicha thaa

Vahee jhukee huee belen vahee dareecha thaa Magar wo phuul saa chehra nazar na aataa thaa Main lauT aayaa hoon khaamoshiyon ke sahraa se Vahaan bhee teree sadaa kaa ghubaar phailaa thaa Shab-e-safar thee qabaa teergee kee pahne hue Kaheen kaheen pe koi raushnee kaa dhabbaa thaa Ye aaDee-tirchhee lakeeren banaa gaya hai kaun Main kya kahoon mire dil kaa varaq to saadaa thaa Main khaak-daan se nikal kar bhee kya huaa aazaad Har ik taraf se mujhe aasmaan ne gheraa thaa Idhar se baar-haa guzraa magar khabar na huee Ki zer-e-sang khunuk paaniyon kaa chashma thaa Vo us kaa aks-e-badan thaa ki chaandnee kaa kanval Vo niilee jhiil thee yaa aasmaan kaa TukDaa thaa Main saahilon men utar kar 'shakeb' kya letaa Azal se naam miraa paaniyon pe likkhaa thaa Wahi jhuki hui belen wahi daricha tha Magar wo phul sa chehra nazar na aata tha Main lauT aaya hun KHamoshiyon ke sahra se Wahan bhi teri sada ka ghubar phaila tha Shab-e-safar thi qaba tirgi ki pahne hue Kahin kahin pe koi raushni ka dhabba tha Ye aaDi-tirchhi lakiren bana gaya hai kaun Main kya kahun mere dil ka waraq to sada tha Main KHak-dan se nikal kar bhi kya hua aazad Har ek taraf se mujhe aasman ne ghera tha Idhar se bar-ha guzra magar KHabar na hui Ki zer-e-sang KHunuk paniyon ka chashma tha Wo us ka aks-e-badan tha ki chandni ka kanwal Wo nili jhil thi ya aasman ka TukDa tha Main sahilon mein utar kar 'shakeb' kya leta Azal se nam mera paniyon pe likkha tha