aagaaz e gul hai shauq magar tez abhii se hai
— Tabish Dehlvi
Aaghaaz-e-gul hai shauq magar tez abhee se hai
Ya.anee havaa-e-baagh junoon-khez abhee se hai
Josh-e-talab hee maujib-e-darmaandagee na ho
Manzil hai duur aur qadam tez abhee se hai
Kyaa irtibaat-e-husn-o-mohabbat kee ho umiid
Vo jaan-e-shauq ham se kam-aamez abhee se hai
Tarteeb-e-kaarvaan men bahut der hai magar
Aavaaza-e-jaras hai ki mahmez abhee se hai
Pahlee hee zarb-e-tesha se koh-e-giraan hai chuur
Hasrat-ma.aal satvat-e-parvez abhee se hai
Kyaa jaane mai-kashon kaa ho kyaa hashr sub.h tak
Saaqee kee har nigaah dil-aavez abhee se hai
Ye ibtidaa-e-shauq ye pur-shauq dil miraa!
Ik jaam-e-aatisheen hai ki labrez abhee se hai
'taabish' bharee bahaar men koee bichhaD gayaa
Ab ke chaman men boo-e-khizaan tez abhee se hai