dekhiye ahl e mohabbat hamen kyaa dete hain

Dekhiye ahl-e-mohabbat hamen kyaa dete hain Koocha-e-yaar men ham kab se sadaa dete hain Roz khushboo tiree laate hain sabaa ke jhonke Ahl-e-gulshan miree vahshat ko havaa dete hain Manzil-e-sham.a tak aasaan rasaa.ee ho jaa.e Is liye khaak patangon kee uDaa dete hain Soo-e-sahraa bhee zaraa ahl-e-khirad ho aao Kuchh bahaaron kaa pataa aabla-paa dete hain Mujh ko ahbaab ke altaaf-o-karam ne maaraa Log ab zahr ke badle bhee davaa dete hain Saath chaltaa hai koee aur bhee soo-e-manzil Mujh ko dhokaa mire naqsh-e-kaf-e-paa dete hain Zindagee marg-e-musalsal hai magar ai 'taabish' Haa.e vo log jo jiine kee duaa dete hain