ik sharar har nafas men aataa hai
— Tabish Dehlvi
Ik sharar har nafas men aataa hai
Soz-e-jaan kis ke bas men aataa hai
Sar-ba-sar main asiir hotaa huun
Jab bhee koee qafas men aataa hai
Kaar-o-anjaam-e-kaar naa-maa'loom
Kaun is pesh-o-pas men aataa hai
SainkaDon khvaahishen hazaar armaan
Dil kahaan mere bus men aataa hai
Sang-e-tiflee se kuchh 'ajeeb maza
Samar-e-neem-ras men aataa hai
Un kaa daaman miraa garebaan ho
Jab kaheen dastaras men aataa hai
Rahrav-e-shauq mo'tabar hee sahee
Vo bhee koo-e-havas men aataa hai
Daa.imee roz-e-vasl ai 'taabish'
Dekhiye kis baras men aataa hai