kisii miskiin kaa ghar khultaa hai
— Tabish Dehlvi
Kisee miskeen kaa ghar khultaa hai
Yaa koee zakhm-e-nazar khultaa hai
Dekhnaa hai ki tilism-e-hastee
Kis se khultaa hai agar khultaa hai
Daav par dair-o-haram donon hain
Dekhiye kaun saa ghar khultaa hai
Phuul dekhaa hai ki dekhaa hai chaman
Husn se husn-e-nazar khultaa hai
Mai-kashon kaa ye tulooa aur ghuroob
Mai-kada shaam-o-sahar khultaa hai
ChhoTee paDtee hai anaa kee chaadar
Paanv Dhaktaa huun to sar khultaa hai
Band kar letaa huun aankhen 'taabish'
Baab-e-nazzaara magar khultaa hai