merii mataa e soz gam e dil nahiin rahaa

Meree mataa-e-soz gham-e-dil naheen rahaa Main rozgaar-e-shauq ke qaabil naheen rahaa Kab se ye sar hai dosh par apne vabaal-e-dosh Kyaa shahr bhar men ek bhee qaatil naheen rahaa Tai kee shikast-e-dil se rah-e-iztiraab-e-dil Ye marhala bhee khair se mushkil naheen rahaa Dekhe hain chashm-e-ghair se 'aib-o-hunar tamaam Khud-aagahee se main kabhee ghaafil naheen rahaa Haasil muraad koshish-e-mashkoor se naheen Jaada bhee ab vaseela-e-manzil naheen rahaa Sar-gashta rooh-e-qais abhee tak hai dasht men Har-chand vo savaar vo mahmil naheen rahaa Jis din se dee ga.ee hai shikast apne aap ko Us din se koee madd-e-muqaabil naheen rahaa Paiham milee hai 'izzat-e-rusvaa.ee 'ishq main Kis roz ye sharaf mujhe haasil naheen rahaa Sairaab mauj mauj se rahne ke baa-vajood Kab tishna kaam bahr se saahil naheen rahaa Kyaa haq ke haq na rahne kaa shikva kare koee Baatil bhee haq to ye hai ki baatil naheen rahaa Ab husn ko hai deeda-e-mushtaaq kee talaash Shaayad ik aa.ina bhee muqaabil naheen rahaa 'taabish' ye khauf hai kaheen khanjar ba-kaf na ho Gardan men ab jo haath hamaa.il naheen rahaa