sab gam kahen jise ki tamannaa kahen jise

Sab gham kahen jise ki tamannaa kahen jise Vo iztiraab-e-shauq hai ham kyaa kahen jise Hai johd-e-munfarid sabab-e-kaarobaar-e-dahr Ik iztiraab-e-qatra hai dariyaa kahen jise Ne.amat kaa e'tibaar hai husn-e-qubool se Ishrat bhee ek gham hai gavaaraa kahen jise Miltaa naheen hai ahl-e-junoon kaa koee suraagh Bas ek naqsh-e-paa hai ki sahraa kahen jise Pahle hayaat-e-shauq thee allaah-re inqalaab Ab e'tibaar-e-gham hai tamannaa kahen jise Hai mere kaa.enaat-e-tasavvur kaa ik fareb Vo jalva-e-khayaal ki duniyaa kahen jise Kuchh kam-nigaahiyaan hain tajallee kee aaD se Aisee bhee ik nigaah-e-tamaashaa kahen jise Tanhaa.ee-e-khayaal se 'taabish' ye haal hai Aisa koee naheen ki ham apnaa kahen jise